Kubemera Imana murabizi ko Satani ifite ubushobozi byo kureshyeshya akarimi karyoshye ikweraka ukuntu ibyiza byose ari ibyawe ariko iyo imaze kukwigarurira bihindura isura. Turaza kurebera hamwe uko abagiye bayoboka Paul kagame na FPR uko byagiye birangira. Ese hari isomo abateganya kumuyoboka cyangwa abarimo kumukorera ubu bakuramo? Ese bibuka ko inkoni ikubise mukeba uyirenza urugo?  Uhongera umwanzi harya bigenda bite ?

Kubatazi Kagame ni umwega w’abakagara bakomoka kuri Rwakagara akaba yarabayeho kungoma ya Rwogera se wa Rwabugili akaba yari akomeye cyane akaba ariwe wabyaye kabale, kayondo  Ruhinankiko na Kanjogera utararangwaga n’impuhwe ndetse na Kigenza sekuruza wa Kagame.

Abega nabo bageze aho bashaka kuba abami niko gushaka uko bagera ku ngoma Rwakagara wari umaze gusaza, nibwo yafataga umwana we w’umuhererezi Kanjogera wari ingumba bamushyingira Rwabugili hakaba rero haraje ubumanyanga bwemeza ko Musinga ari umwana wa kanjogera ariko nanone abahanga batubwira ko abyarwa na Kabare.

Ingoma nyiginya rero yatsindiwe ku Rucunshu, Kabare aterura umuhungu we Musinga ati ingoma irabazwa haguma umwami kandi ng’uyu. Icyo gihe yari afite imyaka 12. Ng’uko uko abakagara batangiye kuyobora u Rwanda bakaruyoborana umuvumo bavumwe na Rutalindwa  Mibambwe wa kane

Abakagara baravumwe niyo mpamvu barangira nabi. Mwabonye Musinga nababwiye ko abyarwa na Kabare ? Muzi ko yaguye ishyanga aho bita Moba, Rudahigwa umuhungu wa Musinga yaguye i Burundi apfa adasize umwana. Kigeli wa gatnu Ndahindurwa nawe yaguye ishyanga apfa ari ingaragu kubera umuvumo.

Ntabwo ari Ndahindurwa wavumye ingoma gusa na Nyirabiyoro yarabavumye ubwo bigaruriraga umubari barashyingiwe umukobwa w’ibwami witwaga Nyabugondo, Ndabarasa akigarurira ingoma y’abazigaba, umuhinza Biyoro n’abandi bayobozi bakomeye bakicirwa muminsi mikuru yari yateguwe, kubera ko Biyoro yari yatumweho na sebukwe ko azamutura inzoga

Muri make rero tugarutse ku Rwanda rw’ubu tubona ko Kagame aruyoborana umuvumo ukomoka aho haruguru tumaze kuvuga. Byitwa ko yatsinze urugamba ariko siko biri kuko mwabonye imivu y’amaraso yatembye na n’ubu akaba agikomeje atarunamura icumu.

Ababyeyi bohereje abana mu rugano kumushyigikira ku rugamba abo bose yarabamaze, abo bageranye ku butegetsi nabo arabagerereye harimo Rudasingwa, Gahima, Kayumba Nyamwasa, nyakwigendera Karegeya n’abandi. Umugani ugana kariho, ngo basangira amaraso ntibasangira amata. None ibyo tutabonye muri ibi bihe bya bya FPR ni ibihe?

Abahutu barayobotse, abamuhunze bamwe abatsinda aho bamuhungiye abandi abatumaho barataha nka Rwarakabije na Mukantabana Serafina. Aba bakaba baragororewe kubera kumufasha gutsikamira rubanda rwamuhunze. Ikindi kandi nabibutsa ko Rwarakabije ni umwe wakomeje gusenya FDLR ndetse akagenda anohereza ibyitso byinshi muri rubanda murwego rwo gushyigikira ubwami bw’umwakagara tukaba dufite amazina amwe y’abantu bagiye boherezwa nabo bantu bombi (Rwarakabije na Mukantabana) mukuza gusenya opposition.

Ndibuka twigaragambya i Paris mu Bufaransa dusaba ko Rosa Kabuye yafatwa agashyikirizwa ubutabera ariko mpatsibihugu yamufashije gucika  ubutabera kubera ya Framaçon navuze hejuru ava mu Budage azanwa i Paris ahava asubira i Kigali.  Ubwitange uwo Mubyeyi yakoreye Kagame n’ingoma ye ubu bigaragara ko yamusubije ku isuka n’aho ahinga urusenda ntirwere.

Si abo gusa uko hari abanyeshuri benshi icyo gihe cya Roza kabuye bagiye imbere ya ambassade bavuga ngo Roza wacu none abo banyeshuli bose barangije za kaminuza abenshi bagiye gucuruza caguwa Nyabugogo none nayo barayiciye ubu basubiye ku ivuko.

Evode Uwizeyimana icyo atakoze ngo ashimishe FPR ni igiki?  Olivier Nduhungirehe ninde wamurusha gukorera FPR?  Aba bose se ibyo bahembwe hari utabizi?

Ikibabaje ni ukuntu Kagame akora uko ashoboye ngo atwereke uwo ariwe ariko benshi bakanga kumva. Uhongera umwanzi amara ibye, ubwo abagifite umwanya wo kwiruka inyuma ya FPR barwana urugamba rutari urwabo nababwira iki.

Murumva rero ko bitoroshye gukorera ibivume niyo mpamvu mugomba guharanira Urwanda rutemba amata n’ubuki rudatemba amaraso n’imiborogo

Mbifurije amahoro y’Imana n’Urwanda ruzira ivangura iryo ariryo ryose

KARENGERA Augustin